Tuesday, July 05, 2005

... صورة


الصورة دى من الصور العزيزة أوى على قلبى .. يمكن ما قبلتش أى حد من الجيل ده كلهم ماتوا من زمان أو يعنى اللى أعرفهم فى الصورة دى.. العروسة تبقى خالة بابا دى الحمد لله يمكن الوحيدة اللى مازالت على قيد الحياة.. شفتها هى شخصيا قبل ما أشوف الصورة دى ولم شفت الصورة وحبيت أعرف مين دول طبعا أتصدمت قلت معقول دى هى دى طبعا الصورة دى من جيلين فاتوا فأكيد متخيلين شكلها دلوقت
العريس يقه الله يرحمة أتوفى من كام شهر كده ومعرفش عنه أى حاجه غير أسمه.. وأنه كان جوز خاله بابا طبعا
اللى جنب العروسة لزم دى تبقى جدتى أم بابا.. الله يرحمها برده .. مشوفتهاش خالص ماتت من حوالى 25 سنة ساعتها كان بابا لسه خاطب فأكيد مشوفتهاش
اللى جنب اللى جنب العروسة تبقى خالة بابا التانيه .. برده الله يرحمها... بنتها بقى صاحبتى أوى .. طبعا ما يخفاش عليكم أن بنتها دى دلوقتى جده وعندها 3 أحفاد ..(فما بالكم العروسة نفسها ) ما علينا .. المهم أنا بحبها أوى وممكن نفضل نتكلم مع بعض بالساعت تحكيلى عن الجيل القديم والذكريات بتاعتهم .. بيبقى أجمل وقت بالنسبالى .. ونطلع الصور القديمة وتقولى قصة حياة كل واحدده ابن مين وأتجوز مين وعاش كام سنة وأيه اللى حصله فى حياته .. كده يعنى
المهم فى الصورة ده هو شكل الناس .. شكلهم عجيب مووت .. ضحكتهم .. لبسهم .. تسريحتهم العجيبه .. اللى كلهم عملنها حتى العروسة شخصيا ( التسريحه دى أسمها بوجودى معلوات عامه يعنى )...الصورة دى وكل الصور الى زيها بتخليك تسرح مع نفسك كده وتفكر ياترى بعد 30 سنه حيكون شكلك ايه .... الجيل اللى بعدينا واللى بعده حيبقوا مستغربينا أوى كده ... مش عارفه
هى يمكن صورة عادية .. بس بالنسبالى حاجه كبيرة أوى .. عالم تانى وناس تانية كانت زينا كده ليهم أحلامهم وحياتهم ... بس دلوقتى هم فين .. عملوا أيه فى حياتهم .....ياترى عملوا اللى نفسهم فيه .. كانوا مبسوطين ..؟؟؟؟...طب لو كانوا مبسوطين ايه اللى كان بيخليهم يعملوا بوجودى فى شعرهم؟؟

4 Comments:

Blogger Mr-Biboooo said...

مش عارف ليه حاسس من ابتسامتهم ان احنا صعبانين عليهم و كأنهم بيقولولنا ربنا معاكو
كل ماجى ابص للصورة الاقيهم كأنهم هما اللى بيبصو مش انا
يا ريت صاحبتك اللى بتقولى عليها تكلمك عن زمانهم و تكتبي حكايتها على البلوج حتى ممكن بلوج خاص

8:20 AM  
Blogger Guevara said...

لم يثبت علميا ً أن البجودي هو أحد أعراض الاكتئاب المزمن

6:39 PM  
Blogger أنا said...

الصوره هايله
عجبني تعليق "جيفارا"برغم اننا خصوم
لكن تعالي نعكس السؤال "ياتري كان شكلني احنا هيبقه ايه لو كنا جينا قبل كده بتلاتن أربعين سنه!؟
ويتاري كنا هنعمل برضه بوجودي.. وكنت انا هفرق شعري من الوسط علي طريقة فتي مصر الاول البشمهندس /عماد حمدي
كانت ايام

8:02 PM  
Blogger Ahmed Shokeir said...

الناس دى أنا بيتهيألى اعرفهم

3:48 AM  

Post a Comment

<< Home