Monday, July 11, 2005

ولاد الحلال

حاجه عبيطة أوى ... تركب مع سواق تاكسى وكالعادة يفضل يشكيك همه وأنت هاين عليك تخنقه عشان يسكت وتدور على حد تشكيله همك .. لكن الغريب أنك تركب مع سواق تاكسى ويحاول يشحت منك ... دى مصيبه سودة .. والمصيبه الاسود أنك تصدقه وتبقى خلاص حتطلع اللى فى جيبك تديهوله وفجأه ربنا ينور طريقك وتحس أنك كنت على وشك تاخد قفا محترم كالعادة كل ما تحاول تعمل نفسك ابن ناس وتكسب ثواب فى واحد وتكتشف أنه نصاب ونصب على 10 زيك وأجدع منك وتحلف ميييت يمين أنك مش حتساعد غير اللى تحس أنه محتاج بجد .. عشان يجى اللى بعده يديك قفا أكثر أحتراما من اللى قبله.. من كام يوم كده ركبت مع سواق تاكسى كان مركب ناس قبلى ولما تزل الناس اللى معاه أول كلمه قالها ناس غريبه واللهى .. تضامنا منى مع أنى مش فاهمه أى حاجه ولا مين دول أصلا بس عشان محرجش الراجل قولتله معلش .. طبعا ما صدق أنى رديت عليه راح موطى الراديو اللى كان فاتحه على أذاعة الاغاتى وابتدى وصلة النصب .. تصدقى يا أستاذه وديت أمى تجيس رجليها شرخ بسيط كده بس جبست رجليها تخيلى الدكتور عايز 80 جنيه .. طبعا اتضايقت أوى وقولتله لا خول ولا قوة الا بالله معلش .. وكلام من ده بس كان من قلبى والله .. بس قالى بعدها الدكتور حاجز أمى فى المستشفى أديته 65 جنيه مرضاش ابدا وقولت للدكتور حنزل الملك ال 15 جنية الباقين بأى طريقة حتى لو حشحت من الناس اللى فى الشارع .. !! طبعا على طول عنيا دمعت وصعب عليا اوى وقولتله ربنا يقويك دى ناس معندهاش قلب ومعلش وفضلت طول الطريق أفكر ازاى أديله فلوس من غير ما أجرحه أو احسسه أنه بيشحت ... وفضل طول الطريق يدعى لنفسه .. ربنا يقوينى ... حلها من عندك يا رب ... يا رب وقفلى ولاد الحلال .. يا رب ماليش غيرك .. أنا حجمع الفلوس حتى لو حشحت من اليهود ...وفضل يدعى ويبالغ أوى ويهز راسه بحسره وهو بيضرب بطرف عينه على الفلوس اللى فى ايدى يشوف اخرى كام بالظبط.. وقتها بس حسيت بالقفا اللى قولنلكوا عليه .. محاولة النصب .. من كترما دعى و كلم نفسه وفضل يقول أعمل ايه وأتصرف ازاى كأنه بيسمعنى وبيقولى خدى بالك بقه خلى عندك دم .. بقولك محتاج هه فتحى شويه ... حسيت أنى شفت المنظر ده قبل كده لما يوقفك حد فى الشارغ يقولك محطه مصر فين تقوله دى بعيده أوى يكلم نفسه بصوت عالى .. طب اعمل ايه يا ربى أروح فين .. اجى منين .. أجيب فلوس منين أروح هناك .. كده يعنى تعرف على طول انك كان حيتنصب عليك وربنا سترها معاك .. دى عمليات نصب ساذجه بتحصل كل يوم وبنقع فيها برده بس بنيه صافيه أنك كان نفسك تساعد حد .. ويتحرق دمك أوى لما تاخدك الشهامه وتتطلع كل الى فى جيبك وبعدين تفهم النصبه وأنك اتضحك عليك بالقوى .. مش زعل على الفلوس بس زعل أنها مرحتش لحد محتاجها بجد .. المهم فى الموضوع أنى بقول كده عشان تاخدو بالكم من التاكسى اياه عشان لو حاول يعنى يضحك عليك أو حاجه .. يعنى أهى نصيحة يمكن تنفع فى حاجه وميتنصبش عليك عشان أول ما حد يقولك أمى محجوزة فى المساشفى تضحك وتقول فى نفسك ولاد الحلال مخلوش لولاد الحرام حاجه

8 Comments:

Blogger Lasto-adri *Blue* said...

ولا الأنكت لما واحد خلا بنتين زى القمر والله العظيم.. يعنى الكبيرة فيهم متجيش عشؤ سنين.. ولقتها بتقرب ليا وتقول: هو عشان أروح ..... أركب إيه؟!
قلتلها كذا.. فردت: طب مينفعش أمشيها: قلتلها لاء صعب قوى عليكى.. إركبى ميكروباص أحسن..
وإتفاجأت إنها سألت نفس السؤال لواحد ماشى ورايا آل يعنى ماسمعتش..

والله عندك حق.. ولاد الحرام مخلوش لولاد الحلال حاجة!

6:00 AM  
Blogger Mr-Biboooo said...

انا اللى يغيظنى اللى يقف على باب الجامع يسأل الناس و على بعد خطوة منه بيت اللى رازق الناس رغم انه لو دخل الجامع و سأل ربنا بدل الناس اكيد ربنا هيرزقه لكن هو اصلا مصلاش ...
عموما ملاقيش معاكى عشرة جنيه اجيب ماوس عشان الكمبيوتر بتاعى

1:46 PM  
Blogger إنسان خردة للبيع said...

النكته اللى بجد حصلتلى مرة لما ركبت مع سواق تاكسى من أياهم و قعد يقولى أن مراته فى المستشفى بتولد و انه معوش فلوس فراح لأخوه يستلف منه لكن مرات أخوه خلت أخوه ميدلوش فلوس بعد كده قعد يشتم فى مرات أخوه و يدعى لمراته و ... و ... الخ
و بعد ما وصلنى و قديته الفلوس اللى كنت هدفعها ابتدى يعيط و أنا عايز اكتر لغاية ما دفعتله جنيه زياده
النكتة ان بعد 3 سنين - كنت وصلت أولى جامعة ساعتها - ركبت مع نفس السواق و قعد يحكيلى نفس الحكاية طبعاً ممسكتش نفسى من الضحك و لما سئلنى و هو بيغلى انت بتضحك ليه كملتله الحكاية بتاعته قعد يبصلى بذهول و فضل ساكت باقى الطريق ... الناس ديه فعلاً غريبة

9:07 AM  
Blogger Nefsy said...

ايه ده انت برده ركبت مع نفس السواق.. بس اللى ركبت معاه كان حلته أصعب باع كل اللى فى البيت وسايب ولاده عند الجيران .. نكته والله بجد

4:57 AM  
Blogger littilemo said...

تصورى دلوقتى بس حسيت بالقفا اللى هو انا

3:25 PM  
Blogger Nefsy said...

قلبك ابيض .. تعيش وتاخد غيرها

11:05 AM  
Blogger S H E B A K said...

انا كمان قفا ... بس مش علطول يعنى
:-)
على فكرة أنا قابلت نفس الست بناعن محطة مصر منين دى بس تلت مرات بقى لدرجة انى حسيت انها بتطاردنى انا بالذات , أول مرة اديتها فلوس و تانى مرة مشيت و سيبتها و تالت مرة بقى قالتلى محطة مصر منين فقلتلها ياااه انتى لسه ماروحتيش ؟؟
هيا من هنا كده و تاخد مشى بتاع تلات تيام .. و مشيت و سيبتها وهى مستغربانى و الناس بتبصلى بنظرة قرف ازاى أكلم الست البسيطة دى بالطريق البايخه دى ... بس حسيت أنى خدت حقى

2:38 AM  
Blogger arab girlscool said...

This is such a nice addition thanks!!!
عرب كول
شات صوتي
شات مغربي
إنحراف كام
شات عرب كول
صوتي
دردشه صوتيه
سعودي كول

12:33 AM  

Post a Comment

<< Home