7aga fe nefsy

2006-01-06T02:00:00.000-08:00

2006-01-06T01:58:00.000-08:00

دعوة لكل المدونين

2005-08-10T00:53:00.000-07:00

طبعا الموضوع مش محتاج دعاية ولا اى كلام اقوله بس ده واجب عليا لأنى ملقتش اى كلام ممكن اعلق بيه على البوست الجديد بتاعه فلازم وحتما وضرورى تشوفوا البوست الجديد بتاع الاستاذ الباشا اللى مدوخنا معاه جيفارا طبعا .. والله الموفق ... سلامتى يا ريس جيفارا

التعويذه

2005-07-31T07:59:00.000-07:00

صورة كئيبه عارفه وممله بس اعمل ايه بقالى 3 مرات اكتب بوست وكل واحد مختلف عن التانى ولسه حقول يا هادى وأبعت الاقى حد لذيذ يعدى يخبط السلك فالدنيا تضلم قدامى والكمبيوتر يقفل ولا كأنى عملت حاجه .. تانى مره هه فاضلى سطرين وابعت .. النور يقطع ..

ما علينا .. دى صدفة ودى صدفة .. أنما بقى اجى أبعت برده الاقى الكمبيوتر يتطوع كده ويقفلى كل المواقع اللى فاتحتها .. برده قبل ما ابعت .. لا بقى ده عند

قلت أبعت صورة .. بعت صورة حلوه كده وجميله .. تفتكروا يبعت .. لأ طبعا يقولى غلط فى البلوج . ...... ليه محدش يعرف

مافيش غير الصورة الكئيبة دى اللى ربنا فك نحسها الوحيده اللى اتيعتت قولت خلاص بقى اكراما ليها حسيبها يمكن دى اللى تكسر التعويذه اللى على البلوج بتاعى ...... حاجه تجنن

2005-07-22T03:59:00.000-07:00

..........

2005-07-17T06:57:00.000-07:00

شعور غريب ومخيف أنك تبقى مش حاسس بأى حاجه ..لا حاجه قادره تفرحك .. ولا حاجه ممكن تزعلك .. لا أنت فرحان لحد ولازعلان على حد

لا عارف تحب ولا قادر تكره .. حاسه أنى مش عايشه .. ما فيش أى حساس بأى حاجه .. بعد ما كنت أشوف ضحكة طفل ابكى أحس ان الدنيا كلها بتضحك .. وأشوف دمعته أبكى معاه ..بقيت مش حاسه بأى أحساس .. لا حاسه أنى عملت حاجة غلط .. ولا واثقة أنى ماشيه صح .. النيا متشقلبه عندى ... قوق تحت و تحت فوق ..لا ضحكه بضحكها من قلبى .. ولا دمعه قادرة تنزل من عينى .. أول مره أحس أن عندى قلب .. مش عشان بيدق بس عشان بقى زى الحجر فى صدرى . حاسه بيه أوى .. مقبوض على طول .. مش قادرة اتنفس منه .. حاسه أنى بتخنق . . بغرق ..

كل اللى قادره أعمله كل كام يوم أبكى على حاجات راحت منى انا مش عرفاها .. وأسأل نفسى ليه قلبى جمد كده .. ازاى بقى قاسى كده .. مين موته بعد ما كان صاحى وبيدق .. كان مالى الدنيا حب وفرح وبكى .. كان يفرح ويزعل ويغير ويحب ويدق ويضحك .. بس مات .. قسى ... جمد .. تاه منى .. بس عايزاه يرجع .. محتاجاه أوى .. أحس زى الأول .... أفرح ... أبكى....... احب ..

قلب فاضى

2005-07-15T16:00:00.000-07:00

حد عايز قلب فاضى .. قلب طيب قلب هادى

قلب كله حنان وعطف .. يخطفك من الحزن خطف

قلبى شارى مش ببيعه .. قلبى غالى مش حيرخص

قلبى لسه فى عز ربيعه .. بس نفسه فى قلب مخلص

قلب ناوى يحب حبيبه.... قد كل الناس متحبوا

واللى شوقه فى يوم حيجيبه .. يا هناه ويا فرح قلبه

منييير .. كعادته .. ياخد اللى فى قلبى ويقوله .. ومعرفش انه كان فى قلبى الا لما أسمع الأغنيه وتدخل قلبى من أول كلمه عشان طلعه من قلبى

هو قال اللى فى قلبى . وقلبه .. حسيت أن الأغنيه دى ليا ... وليه هو كمان

الأغنيه قالت حاجات حصلتلى .. وكلام قلته .. ومشاعر حسيتها

قالت اللى عايزه أقوله ومعرفتش

قالت اللى فى قلبى .. هو ده منير .. وهو ده قلبى .. قال فاضى

ولاد الحلال

2005-07-11T12:18:00.000-07:00

حاجه عبيطة أوى ... تركب مع سواق تاكسى وكالعادة يفضل يشكيك همه وأنت هاين عليك تخنقه عشان يسكت وتدور على حد تشكيله همك .. لكن الغريب أنك تركب مع سواق تاكسى ويحاول يشحت منك ... دى مصيبه سودة .. والمصيبه الاسود أنك تصدقه وتبقى خلاص حتطلع اللى فى جيبك تديهوله وفجأه ربنا ينور طريقك وتحس أنك كنت على وشك تاخد قفا محترم كالعادة كل ما تحاول تعمل نفسك ابن ناس وتكسب ثواب فى واحد وتكتشف أنه نصاب ونصب على 10 زيك وأجدع منك وتحلف ميييت يمين أنك مش حتساعد غير اللى تحس أنه محتاج بجد .. عشان يجى اللى بعده يديك قفا أكثر أحتراما من اللى قبله.. من كام يوم كده ركبت مع سواق تاكسى كان مركب ناس قبلى ولما تزل الناس اللى معاه أول كلمه قالها ناس غريبه واللهى .. تضامنا منى مع أنى مش فاهمه أى حاجه ولا مين دول أصلا بس عشان محرجش الراجل قولتله معلش .. طبعا ما صدق أنى رديت عليه راح موطى الراديو اللى كان فاتحه على أذاعة الاغاتى وابتدى وصلة النصب .. تصدقى يا أستاذه وديت أمى تجيس رجليها شرخ بسيط كده بس جبست رجليها تخيلى الدكتور عايز 80 جنيه .. طبعا اتضايقت أوى وقولتله لا خول ولا قوة الا بالله معلش .. وكلام من ده بس كان من قلبى والله .. بس قالى بعدها الدكتور حاجز أمى فى المستشفى أديته 65 جنيه مرضاش ابدا وقولت للدكتور حنزل الملك ال 15 جنية الباقين بأى طريقة حتى لو حشحت من الناس اللى فى الشارع .. !! طبعا على طول عنيا دمعت وصعب عليا اوى وقولتله ربنا يقويك دى ناس معندهاش قلب ومعلش وفضلت طول الطريق أفكر ازاى أديله فلوس من غير ما أجرحه أو احسسه أنه بيشحت ... وفضل طول الطريق يدعى لنفسه .. ربنا يقوينى ... حلها من عندك يا رب ... يا رب وقفلى ولاد الحلال .. يا رب ماليش غيرك .. أنا حجمع الفلوس حتى لو حشحت من اليهود ...وفضل يدعى ويبالغ أوى ويهز راسه بحسره وهو بيضرب بطرف عينه على الفلوس اللى فى ايدى يشوف اخرى كام بالظبط.. وقتها بس حسيت بالقفا اللى قولنلكوا عليه .. محاولة النصب .. من كترما دعى و كلم نفسه وفضل يقول أعمل ايه وأتصرف ازاى كأنه بيسمعنى وبيقولى خدى بالك بقه خلى عندك دم .. بقولك محتاج هه فتحى شويه ... حسيت أنى شفت المنظر ده قبل كده لما يوقفك حد فى الشارغ يقولك محطه مصر فين تقوله دى بعيده أوى يكلم نفسه بصوت عالى .. طب اعمل ايه يا ربى أروح فين .. اجى منين .. أجيب فلوس منين أروح هناك .. كده يعنى تعرف على طول انك كان حيتنصب عليك وربنا سترها معاك .. دى عمليات نصب ساذجه بتحصل كل يوم وبنقع فيها برده بس بنيه صافيه أنك كان نفسك تساعد حد .. ويتحرق دمك أوى لما تاخدك الشهامه وتتطلع كل الى فى جيبك وبعدين تفهم النصبه وأنك اتضحك عليك بالقوى .. مش زعل على الفلوس بس زعل أنها مرحتش لحد محتاجها بجد .. المهم فى الموضوع أنى بقول كده عشان تاخدو بالكم من التاكسى اياه عشان لو حاول يعنى يضحك عليك أو حاجه .. يعنى أهى نصيحة يمكن تنفع فى حاجه وميتنصبش عليك عشان أول ما حد يقولك أمى محجوزة فى المساشفى تضحك وتقول فى نفسك ولاد الحلال مخلوش لولاد الحرام حاجه

فلسفتى

2005-07-11T01:34:00.000-07:00

هى الدنيا كده .. تفضل طووول عمرك مستنى عربيه اخر موديل توصلك أحسن مكان وتفضل مستنى مستنى وتضيع تلات أربع سنين كده وبعدين تعرف أنها مش جايه .. فتقول حركب أى عربيه نضيفة وخلاص... ومتجيش .. تستنى اى عربيه.... اى حاجه .. برده متجيش.. تقول حركب تاكسى .. بس نضيييف.. طبعا.. أنا مضيعش كل ده من عمرى وفى الاخر أركب أى حاجه .. وبردددده ميجيش .. وتفضل مستنى مستنى .. مستنى .. وفى الاااااااااااخر بعد فوات الاوان .. تركب مشروع .. وينزلك فى حته غلط ... أوى

... صورة

2005-07-05T06:10:00.000-07:00

الصورة دى من الصور العزيزة أوى على قلبى .. يمكن ما قبلتش أى حد من الجيل ده كلهم ماتوا من زمان أو يعنى اللى أعرفهم فى الصورة دى.. العروسة تبقى خالة بابا دى الحمد لله يمكن الوحيدة اللى مازالت على قيد الحياة.. شفتها هى شخصيا قبل ما أشوف الصورة دى ولم شفت الصورة وحبيت أعرف مين دول طبعا أتصدمت قلت معقول دى هى دى طبعا الصورة دى من جيلين فاتوا فأكيد متخيلين شكلها دلوقت

العريس يقه الله يرحمة أتوفى من كام شهر كده ومعرفش عنه أى حاجه غير أسمه.. وأنه كان جوز خاله بابا طبعا

اللى جنب العروسة لزم دى تبقى جدتى أم بابا.. الله يرحمها برده .. مشوفتهاش خالص ماتت من حوالى 25 سنة ساعتها كان بابا لسه خاطب فأكيد مشوفتهاش

اللى جنب اللى جنب العروسة تبقى خالة بابا التانيه .. برده الله يرحمها... بنتها بقى صاحبتى أوى .. طبعا ما يخفاش عليكم أن بنتها دى دلوقتى جده وعندها 3 أحفاد ..(فما بالكم العروسة نفسها ) ما علينا .. المهم أنا بحبها أوى وممكن نفضل نتكلم مع بعض بالساعت تحكيلى عن الجيل القديم والذكريات بتاعتهم .. بيبقى أجمل وقت بالنسبالى .. ونطلع الصور القديمة وتقولى قصة حياة كل واحدده ابن مين وأتجوز مين وعاش كام سنة وأيه اللى حصله فى حياته .. كده يعنى

المهم فى الصورة ده هو شكل الناس .. شكلهم عجيب مووت .. ضحكتهم .. لبسهم .. تسريحتهم العجيبه .. اللى كلهم عملنها حتى العروسة شخصيا ( التسريحه دى أسمها بوجودى معلوات عامه يعنى )...الصورة دى وكل الصور الى زيها بتخليك تسرح مع نفسك كده وتفكر ياترى بعد 30 سنه حيكون شكلك ايه .... الجيل اللى بعدينا واللى بعده حيبقوا مستغربينا أوى كده ... مش عارفه

هى يمكن صورة عادية .. بس بالنسبالى حاجه كبيرة أوى .. عالم تانى وناس تانية كانت زينا كده ليهم أحلامهم وحياتهم ... بس دلوقتى هم فين .. عملوا أيه فى حياتهم .....ياترى عملوا اللى نفسهم فيه .. كانوا مبسوطين ..؟؟؟؟...طب لو كانوا مبسوطين ايه اللى كان بيخليهم يعملوا بوجودى فى شعرهم؟؟

الى نفسى

2005-07-03T02:46:00.000-07:00

عندما تمضى طيلة حياتك تبحثين عن شئ ما وعندما تجديه تمضى الباقى من حياتك تخشين ان تفقديه ... فانك تفسدين حياتك

عندما أغلقت عليه باحكام وسددت كل السبل للدخول اليه وعندما وجدت من يستحق أن تفتحية لأجله ...فتحتيه قليلا ثم أحكمت الغلق عليه أكثر حتى لا تسمحين له بخدشه .. فربما كان من الافضل أن تتركيه مغلقا

عندما يكون الشخص الوحيد القادر على أسعادك .. هو الشخص الوحيد الذى تخشين أن يكون سببا فى تعاستك فلا تمنحيه فرصة لأسعادك .. فانك تخشين السعادة

عندما لا تنمحين أحد فرصة للتدخل وتسمحين لكل أحد بأحساسك بالشك .. فأنك تضيعين على نفسك كل فرصة للشعور بالأمان

اذا كنت تخشين الحياة والسعادة .. والحب ... لم أضعت عمرك فى البحث عنهم

كده أحسن

2005-06-26T13:32:00.000-07:00

هى الناس ليه قلبها أسود أوى أوى كده ... ليه محدش نيته صافية ويتمنالك الخير.... ليه الكل شمتان فيك وعايز الحاجة الوحشه تحصلك قبل الحاجة الحلوة كأنهم متراهنين عليك أنك حتفشل .. أن اللى عايزه مش حيحصل واللى بتحلم بيه كل لحظه حيضيع منك .. بس عشان يثبتوا أنهم صح

ليه كلامهم جارح كده ليه بيدوروا على اللى بيوجعك ويقولوه ... مع أنك مبتعملش حاجه وحشه لحد وبتحاسب على كل الناس عشان متجرحش حد و متأذيش حد

الناس مش بتتكلم ... بتحدف طووب

بس أنا تعبت وزهقت

مش عارفة ايه الحل ..أفصل نفسى عن كل الناس .. مكلمش حد عشان محدش يضايقنى ويجرحنى.. أفضل لوحدى

ولا أحسن أتعلم أجرح أنا كمان واللى يوجعنى بكلمة أدور على الى يوجعه و أجرحه بيه

ولا خلينى زى ما أنا ..أتجرح وأسكت .. عشان عارفة أنى عمرى ما حعرف أجرح ولا أوجع حد

.. مش عايزه أجرح حد عشان عارفة اللى بيتجرح بيحس بأيه

... خلينى كده أحسن

اذا كنت بقرة ؟

2005-06-23T04:46:00.000-07:00

حاجة قريتها عجبتنى قولت أشارككم فيه

اذا كنت بقرة فهل تخاف من مصيدة الفئران
نعم أم لأ
اليكم هذه الحكاية
كان اللعاب يسيل من فم الفأر، وهو يتجسس على صاحب المزرعة وزوجته، وهما يفتحان صندوقا أنيقا، ويمنِّي نفسه بأكله شهية، ..لأنه حسب أن الصندوق يحوي طعاما، ولكن فكه سقط حتى لامس بطنه بعد أن رآهما يخرجان مصيدة للفئران من الصندوقواندفع الفأر كالمجنون في أرجاء المزرعة وهو يصيح: لقد جاءوا بمصيدة فئران... يا ويلنا!

هنا صاحت الدجاجة محتجةاسمع يا فرفور، المصيدة هذه مشكلتك أنت' فلا تزعجنا بصياحك وعويلك فتوجه الفأر إلى الخروف: الحذر، الحذر ففي البيت مصيدة،: فابتسم الخروف وقال يا جبان يا رعديد، لماذا تمارس السرقة والتخريب طالما أنك تخشى العواقب! ثم إنك المقصود بالمصيدة فلا توجع رؤوسنا بصراخك، وأنصحك بالكف عن سرقة الطعام وقرض الحبال والأخشاب

هنا لم يجد الفأر مناصا من الاستنجاد بالبقرة التي قالت له باستخفاف؟ يا خراشي... في بيتنا مصيدة يمه الحقيني! ! يبدو أنهم يريدون اصطياد الأبقار بهاهل أطلب اللجوء السياسي في حديقة الحيوان؟

عندئذ أدرك الفأر أن سعد زغلول كان على حق عندما قال قولته الشهيرة " مفيش فايدة" وقرر أن يتدبر أمر نفسه، وواصل التجسس على المزارع حتى عرف موضع المصيدة، ونام بعدها قرير العين، بعد أن قرر الابتعاد من مكمن الخطر.وفجأة شق سكون الليل صوت المصيدة وهي تنطبق على فريسة، وهرع الفأر إلى حيث المصيدة ليرى ثعبانا يتلوى بعد أن أمسكت المصيدة بذيله.ثم جاءت زوجة المزارع وبسبب الظلام حسبت أن الفأر "راح فيها"،.وأمسكت بالمصيدة فعضها الثعبان فذهب بها زوجها على الفور إلى المستشفى حيث تلقت إسعافات أولية، وعادت إلى البيت وهي تعاني من ارتفاع في درجة الحرارة.وبالطبع فإن الشخص المسموم بحاجة إلى سوائل، ويستحسن أن يتناول الشوربة ( ماجي لا تنفع في مثل هذه الحالات)،وهكذا قام المزارع بذبح الدجاجة، وصنع منها حساء لزوجته المحمومة،. وتدفق الأهل والجيران لتفقد أحوالها، فكان لابد من ذبح الخروف لإطعامهم ولكن الزوجة المسكينة توفيت بعد صراع مع السموم دام عدة أيام، وجاء المعزون بالمئات واضطر المزارع إلى ذبح بقرته لتوفير الطعام لهم.إذا كان " فهمك تقيل"....فإنني أذكرك بأن الحيوان الوحيد الذي بقي على قيد الحياة هو الفأر، الذي كان مستهدفا بالمصيدة، وكان الوحيد الذي استشعر الخطر...

فكر أيها القارئ، في أمر من يحسبون انهم بعيدون عن المصيدة وأن "الشر بره وبعيد"، فلا يستشعرون الخطر بل يستخفون بمخاوف الفأر

لذي يعرف بالغريزة والتجربة أن ضحايا المصيدة قد يكونون أكثر مما تتصورون

....وما الحياة الدنيا

2005-06-21T09:00:00.000-07:00

ميلدا ... تلك الفتاة الصاخبة المليئة بالحيوية ..الضاحكة .. التى لا تلبث أن تراها فى كل مكان .. تترك هذا لتتحدث مع تلك وتترك هذه لتضحك مع هذا .. وتراها تجلس مع اخر يبثها همومة ليتنتهى جلستهم بضحكة صافية من كلاهما

تلك هى ميلدا التى طالما اثارت انتبهى كلما رأيتها .. ميلدا التى لم أتحدث معها مطلقا .. بل واعرف أنها لم تلحظنى مطلفا .. كل ما جمعنا هو مبنى الكلية .. لم نكن حتى فى العام نفسه كانت تسبقنى بعام .. كانت تلفت أنتباهى ليست لما كانت عليه ولكن لما كنت أنا عليه .. كنت أراها دوما كما لو كانت نقيضى .. هى عكس كل ما كنت أنا عليه .. هى الحياة والمرح والصخب .. وأنا .... لم أعرف يوما أن أكون مثلها ..ربما أكثر ما شدنى أليها هو حب الاخرين لها ذلك الحب الذى كنت أهفو دوما أليه .. ولجوء الكل أليها لتذوذ عنهم من مصاعب الحياة .. تلك هى ميلدا التى ربما لم يلحظها أحد سواى .. التى لم أحادثها يوما .. ميلدا التى كانت نقطة تحول فى حياتى بعد رحيلها

رحلت ميلدا .. لم ترحل بصخب كما كانت حياتها .. رحلت بصمت .. حادث مرورى أودى بحياتها .. لتترك فى قلبى فراغا لم يملأه أحد

ربما لم تعنى لى الكثير فى حياتها سوى كل هذه الخواطر التى تجول فى رأسى كلما رأيتها ..وأنسى كل هذا بمجرد رحيلها من أمامى .. ولكنها عنت لى الكثير بعد رحيلها

عندما سمعت وفاة أحدى الطالبات أنزعجت كثيرا وأنقبض قلبى كثيرا .. لم أقوى على سؤال من تكون الفتاة .. ولم يجل بخاطرى أنى أعرفها ربما لكرهى الشديد للموت والفراق .. وكرهى الأشد ليقينى وأيمانى بالموت الذى لا أستطيع منع نفسى من التفكير فيه وأنا أنظر لكل من أحبهم حولى والسؤال الذى يلح على كلما سمعت خبر وفاة أحد .. من التالى.. .. دون أدنى أمل فى معرفة أجابة لسؤالى .. ليأتى الموت سريعا ليخطف احدا من أحبائى .. ليجيب عن سؤالى بقسوة.. ليحرق قلبى

حتى سمعت خبر موتها ... ميلدا... أرتجف جسدى وأنا أتأكد من الخبر ..أحترق قلبى عليها.. بكيتها كما لم أبكى أحد من قبل .. بكيت الحياة والصخب ..بكيت الحب ..بكيت ميلدا .. كلما تذكرتها تندفع الى رأسى صورة واحده لها .. حينما اردت الخروج من المرسم ..لم تعر أنتباها للباب المجود فى المرسم.. فقط قفزت من النافذه الى الأرض .. لتنفض الغبار عن ملابسها .. وتبتسم

نلك هى الصورة التى لا تكاد تفارق مخيلتى كلما تذكرتها.. صورة الحياة ..لتندفع بعدها صورة أخرى فى رأسى .. صورتها وهى خالية من الحياة .. بلا روح .. فقط جسد ملقى كأنه لم تكن فيه أى حياة من قبل

تلك هى ميلدا .. أتذكرها كلما ضل بى الطريق .. كلما أخذتنى الدنيا .. أتذكرها لترن فى أذنى كلام الله عز وجل عن الحياة فى الايتان "و ما الحياة الدنيا الا لعب ولهو" "وما الحياة الدنيا الا متاع الغرور".. أتذكرها رغم مرور أكثر من عامان على وفاتها.. أتذكر الحياة التى تحولت الى موت .. أتذكر الجسد الحى الذى تحول الى كومة من العظام البالية تحت الأرض .. أتذكر ميلدا

وسأذكرها دوما .. لن أنساها ما حييت ..لن أنسى ميلدا

ملقوش فى الورد عيب

2005-06-19T05:52:00.000-07:00

كنت اجلس منهمكة فى مشروع من مشاريعى الجرافيكية العبقريه ومعزولة تماما عن كل من حولى فى الأتيليه حين أثار أنتباهى حوار يدور بين صديقاتى الجميلات عن هيفاء وهبى وأستنكرهم الشديد لأعجاب الشبابا بها _هذه الأستنكار الذى لا أجد له أى مبرر..رحم الله امرؤا عرف قدر نفسه _ ما علينا..المهم أنى تركت المشروع وأقتربت منهم لأعرف سبب هذه الأستنكار الفظيع

بس البت حلوه برده محدش يقدر ينكر_

بس بس بس أصلك متعرفيش حاجه دى طلعت بست صوابع فى رجليها_

بالطبع شهقت صديقاتى الجميلات من فرط الدهشه ونظرت اليهم ببلاهه غير مستوعبة ما العلاقه بين أصابع قدمها وأعجاب الشباب والمراهقين وكبار السن بالأخت هيفاء ثم شهقت معهم حتى أجاريهم _يمكن أفهم حاجه_ونظرت أليهم أتابع الحوار بشغف

لا لا متقوليش بست صوابع ...يا لهوى وعرفتى منين _

ابدا كانت مبعوتالى صور على النت ليها وفى صورة منهم واقفة على البحر وحافية دققت فى رجليها لقيتها بست صوابع_

لا بتهرجى طب ليها نفس تتصور حافية وهى عارفة أنها بست صوابع_

مش أنتوا جاينلى بكره نشتغل مع بعض فكرونى أوريكم الصوره_

بالطبع ذهبت الى منزلى وقد نسيت تماما المصيبة الكبرى التى أكتشفها صديقاتى الجميلات والتى تخل وتنقص من جمال الأخت هيفاء

فى اليوم التالى ذهبت مع صديقاتى أياهم الى منزل صديقتى مكتشفة الخبر الفظيع وما أن دلفنا الى غرفتها وجلسنا سويا لنكمل مشاريع الكلية حتى هبت احدى صديقاتى كأنها تذكرت أمرا هاما لا يمكن تأجيله

ورينا بقى صورة هيفاء عشان نتأكد _

طبعا كل البنات اتكوموا على الكمبيوتر حتى يروا الفضيحه على حد قول أحداهن

ايه ده صحيح دى بست صوابع يا ساتر يا رب_

نفسى أعرف الولاد بيحبوها على أيه دى ولا صوت عدل ولا أغانى عدلة وكمان بست صوابع_

مهو محدش يعرف أنها بست صوابع لو عرفوا مكنش حد بصيلها اصلا._

ميين عارف ممكن يبقى فيها أيه تانى _

على رأيك والناس كلها عارفة أنها عملة عمليات تجميل يعنى مكنتش قادرة تشيل الصبع ده_

جلست فى صمت أراقب صديقاتى الجميلات وأنا أبتسم فى قرارة نفسى من هذا الحوار الفظيع عايزه أقولهم يا جماعه هيفاء لو بستة وعشرين صوباااع فى الرجل الواحدة محدش حياخد باله برده ... ولا حد بيسمع اغنيها أصلا ولا فاهم هى بتقول أيه ... الناس بتتفرج بس الموضوع مش صوت ولا كلمات أغانى الموضوع أداء وطريقة القاء .. طبعا مش أى طريقة القاء طريقة هيفاء وبس ومخارج الألفاظ عندها ليها تأثير برده محدش يقدر ينكره ... دى الحاجات البسيييطه اللى بتميز الأخت هيفاء طبعا مش حتكلم عن المظهر الخارجى والشكل واللبس و .. ما علينا

وبعدين ما كل بنات مصر بما فيهم أنا وصحباتى بخمس صوابع محدش بصيلنا يعنى

ثم أن الناس لو عرفت أنها بست صوابع مش بعيد كل راجل يقول لمراته تزرع صوباع يمكن ..لعل وعسى تبقى شبه الأخت وأهى أى حاجه من ريحة الحبايب.. يعنى متحولوووووشوبلاش حقد حيفضلوا يحبوها برده سواء بست صوابع من غير صوابع اصلا حتى لو بخرم تالت فى مناخيرها برده على قلبهم زى العسل

سألته اغنية هيفاء بتاعت انا هيفا انا مش فاهمه فيها ولا كلمة ..أنت فاهم حاجه_

قالى ماليش دعوة بالأغنية والكلام الفاضى ده... أنا بشوفها بفصل_

وتقولولى بست صوابع ..هأوووو

الحدق يفهم

2005-06-19T04:24:00.000-07:00

من كام يوم كده كنت فى جلسة عائليه لطيفة مع اخواتى وعمى وأولاده ودخلت فى حوار هام مع مرات عمى بحاول افهمها اسباب الجلسة المقرفصه اللى اشتهرت بيها اللى هو تلاقينى نطيت فوق أى كرسى وربعت أو قعدت مقرفصة فوق الكرسى

كنت بشرحلها أنى عشان ارتاح على اى كرسى لازم اقرفص كده اصل لو قعدت عادى يا أما حسند ضهرى ورجلى تلمس اللأرض بالعافية يا أما أسند رجلى على الأرض ومسندش ضهرى وفى الحالتين مش برتاح فلازم اربع كده على الكرسى وأستفضت فى الكلام وأنا بشرحلها الموقف وأحداثياته كلها ...فجأة خرمت ودنى كلمه قالها أبن عمى فى حواره مع أختى ألا وهى أن كل الستات أغبية

يا نهاااار أسود أيه اللى بقوله ده ؟؟؟؟طبعا ببرأتى وأدبى ولسانى الطويل المعروف فى المواضيع دى اللى بيسخر فيها حد من بنات جنسى لفبتله بكل عصبية وأنا شبه بصرخ ..نعم نعم نعم ميييييين دول اللى اإبييييييييييه

طبعا رد بكل سخريه وبضحكة عبيطة غالبا بشوفها فى وش كل ولد فاكر نفسة أنه أذكى انسان فى أرجاء المعمورة

ده مش كلامى أنا لوحدى ده كلام كل الرجاله _

لا والله ليييييييييييه بقى أن شاء الله مين قال كده متجمعش بس يمكن نوعية البنات اللى أنت عرفتها من النوعية الغبية_

بنفس الضحكة العبيطة ايها وابتسامة معوجه على طرف شفايفه كأنه مبسوط أنه اثار غضبى ونرفزنى ..... الكلام ده مش من عندى ربنا قال كده قال ناقصات عقل ودين

لا معلش ربنا مقلش كده قال ناقصات عقل ودين بس مقلش أغبية قال ناقصات عقل عشان أحنا العاطفة عندنا غلبت على العقل يعنى بنفكر بقلبنا اكتر من عقلتا يعنى حساسين مش أغبية ومش ممكن نكون أغبية عشان ربنا قال أن كيدهن عظيم

ولو برده أغبية.... كلكم أغبية_

لو أنت شايف كده يبقى أحب أقولك أن عمرى ما قبلت راجل ذكى_

هع هع هع ... يبقى ما قبلتيش رجالة _

طبعا سكت عند النقطة دى محبيتش أصدمة بالحقيقة وأقوله أنك من الرجالة اللى مش ذكية يعنى سيادتك مش راااااجل

شوية مرات عمى بتنادى أبنها الذيذ ومقطعالة تفاحة بتقلة خذ يا حبيبى بتدلعه يعنى

لفيتلة تانى عشان وقلتله بقى مامتك تدلعك كده وتقول ان كل الستات أغبية حتلاقى حد يدلعك كده؟؟؟؟؟؟؟؟؟؟

طبعا أنا بشوف دلع أحسن من كده _

طبعا يقصد خطيبته اللى مدلعاه مش عارفة على أية سألته طب وهى عارفه أنك بتقول كده

طبعا عارفة ومقتنعة بكده كمان هى عارفة انها غبية_

هى هى هى طبعا غبية عشان بصيتلك أصلا ده فى سرى طبعا

ما جمع الا لما وفق أنت تقول عليهل غبية وهى تدلعك....وماله أصل لكل مقام مقال __

ولكل بردعة حمار_

ده التعليق الوحيد اللى صدر من بنت عمى من أول الحوار أو الخناقة كلمه جت فى مكانها أوى

بصينا لبعض أنا وهى و ضحكنا كلنا على التعليق بما فينا أبن عمى الذكى اللى مخدش باله مين البردعة ومين الحمااااااااااااااااااااااااااااااار

والحدق يفهم.. ولا أيه..؟؟